'குறைந்த ஆபத்து' குழந்தை புற்றுநோயில் மறைந்திருக்கும் தீவிர புற்றணுக்கள்: ஆய்வு

ராப்டோமையோசார்கோமா (RMS) என்பது தசை திசுவிலிருந்து உருவாகும் ஒரு குழந்தை புற்றுநோய். இந்த நோயுள்ள சிலருக்கு, மருத்துவர்கள் தற்போது "குறைந்த ஆபத்து" என வகைப்படுத்தும் கட்டிகளுக்குள் தீவிரமான புற்றணுக்கள் மறைந்திருக்கக்கூடும் என ஆய்வாளர்கள் கண்டறிந்துள்ளனர். 15 வயதுக்குட்பட்ட குழந்தைகளில் காணப்படும் மிகவும் பொதுவான மென்திசு புற்றுநோய்களில் RMS-ம் ஒன்று; பிரிட்டனில் ஆண்டுக்கு சுமார் 55 பாதிப்பு நிகழ்வுகள் கண்டறியப்படுகின்றன. வெல்கம் சேங்கர் நிறுவனம், கேம்பிரிட்ஜ் பல்கலைக்கழகம், கிரேட் ஓர்மண்ட் ஸ்ட்ரீட் மருத்துவமனை, மற்றும் யுனிவர்சிட்டி காலேஜ் லண்டன் ஆகியவற்றின் இந்த கண்டுபிடிப்புகள், கேன்சர் ரிசர்ச் இதழில் வெளியிடப்பட்டன.

RMS பொதுவாக இரண்டு குழுக்களாகப் பிரிக்கப்படுகிறது; இது ஒரு கட்டி ஒரு மரபணு குறியீட்டைக் கொண்டுள்ளதா என்பதைப் பொறுத்தது. இரண்டு தனித்தனி மரபணுக்கள் இணையும்போது இந்த குறியீடு உருவாகிறது. இந்த இணைவு உள்ள குழந்தைகளுக்கு, தீவிர சிகிச்சை அளித்தாலும் உயிர்வாழ்வு வாய்ப்பு கணிசமாகக் குறைவு. ஆனால் இந்த குறியீடு இல்லாத சில குழந்தைகளுக்கும் தீவிரமான நோய் ஏற்படுகிறது; ஏன் என்பது மருத்துவர்களுக்குப் புரியவில்லை.

தனித்தனி செல்களில் மரபணு செயல்பாட்டை அளக்கும் நுட்பம் சிங்கிள்-செல் ஆர்என்ஏ சீக்வென்சிங். ஒட்டுமொத்த கட்டியின் சராசரியை எடுப்பதற்குப் பதிலாக இது ஒவ்வொரு செல்லையும் தனித்தனியே ஆய்கிறது. திசுவினுள் செல்கள் எங்கு அமைந்துள்ளன என்பதைக் கண்காணிக்கும் மற்றொரு நுட்பம் ஸ்பேஷியல் டிரான்ஸ்கிரிப்டோமிக்ஸ். இந்த இரு நுட்பங்களையும் பயன்படுத்தி, வழக்கமான வகைப்பாட்டில் "உயர்-ஆபத்து அல்லாத" எனக் குறிக்கப்பட்ட கட்டிகளுக்குள் மறைந்திருந்த தீவிர புற்றணுக்களை ஆய்வாளர்கள் கண்டறிந்தனர். மரபணு இணைவு குறியீடு இல்லாதபோதிலும், இந்த தீவிர செல்கள் உயர்-ஆபத்து கட்டிகளில் காணப்படும் மரபணு செயல்பாட்டு அமைப்புகளை நெருக்கமாக ஒத்திருந்தன. இந்த கட்டிகளில் அரிய மரபணு மாற்றங்களையும் ஆய்வாளர்கள் கண்டறிந்தனர்; அவை உயர்-ஆபத்து நோயில் பாதிக்கப்படும் அதே செல்லுலார் பாதைகளை சீர்குலைத்தன.

இந்த ஆய்வின் இணை-மூத்த ஆசிரியரும், UCL புற்றுநோய் நிறுவனம் மற்றும் கிரேட் ஓர்மண்ட் ஸ்ட்ரீட் மருத்துவமனையைச் சேர்ந்தவருமான டாக்டர் கரின் ஸ்ட்ராத்தோஃப் இவ்வாறு தெரிவித்தார். "கட்டிகளை ஒரு நேரத்தில் ஒரு செல்லாக ஆய்வு செய்வதன் மூலம், வழக்கமான முறைகள் கவனிக்காத மறைந்திருந்த தீவிர புற்றணு தொகுதிகளை நாங்கள் கண்டறிந்தோம்" என்றார். "இந்த கட்டிகள் வெவ்வேறு மரபணு மாற்றங்களைக் கொண்டிருந்தாலும், பல அதே தீவிர பாதைகளில் ஒன்றிணைகின்றன" என்றார். மேலும் நூற்றுக்கணக்கான கட்டி மாதிரிகளுக்கு தங்கள் பகுப்பாய்வை விரிவுபடுத்தி, தீவிர குழந்தை புற்றுநோயை உருவாக்கக்கூடிய கூடுதல் அரிய மரபணு வழிகளை ஆய்வாளர்கள் இப்போது தேடி வருகின்றனர்.