மூளைப் புற்றுநோயை ஒளிரவைத்துக் காட்டும் நானோதுகள்கள்

மூளை புற்றுநோய்களில் மிகவும் கடுமையானதாகக் கருதப்படுவது குளையோபிளாஸ்டோமா. புற்றுநோய் செல்கள் அருகிலுள்ள ஆரோக்கியமான மூளைத் திசுவுக்குள் பரவுவதால், மூளையைப் பாதிக்காமல் கட்டியை முழுமையாக அறுவை சிகிச்சை மூலம் அகற்றுவது கடினம். மேலும், மருந்துகள் மற்றும் கதிர்வீச்சு சிகிச்சை மூளைத் திசுவை அடைவதைத் தடுக்கும் இரத்த-மூளைத் தடை இந்தச் சிக்கலை மேலும் அதிகரிக்கிறது. இதன் காரணமாகவே, ஐந்தாண்டு உயிர்வாழ்வு விகிதம் சுமார் 7 சதவீதமாக மட்டுமே உள்ளது.

சிட்னி தொழில்நுட்பப் பல்கலைக்கழகம் (UTS), ஹார்வர்ட் பல்கலைக்கழகம் மற்றும் ஹேனான் பல்கலைக்கழக ஆய்வாளர்கள் இணைந்து இந்த ஆய்வை மேற்கொண்டனர். நானோதுகள்களைப் பயன்படுத்தி, இரண்டு பிரச்சினைகளையும் ஒரே பொருள் மூலம் சமாளிக்கும் 'இரட்டை அடி' தளத்தை அவர்கள் உருவாக்கியுள்ளனர். நானோதுகள்கள் என்பவை பில்லியனில் ஒரு மீட்டர் அளவில் அளக்கப்படும் மிகச்சிறிய துகள்கள். இந்த ஆய்வு முடிவுகள் சயின்ஸ் ட்ரான்ஸ்லேஷனல் மெடிசின் என்ற ஆய்விதழில் வெளியிடப்பட்டுள்ளன. இதன் மையத்தில், குறைக்கடத்தி உற்பத்தியில் பயன்படும் முறையைத் தழுவி, ஒவ்வொரு பிளாட்டினம் அணுவாகப் பொருத்தப்பட்ட மெல்லிய இரு பரிமாணத் தகடு உள்ளது.

இந்தத் தகடு, ஒரே அகச்சிவப்புக்கு அருகிலான ஒளியால் இயக்கப்படும் இரண்டு பணிகளுக்கு இடையே மாறுகிறது. அறுவை சிகிச்சையின்போது கட்டியைக் காட்டும் படமெடுப்புக் கருவியாகவும், பின்னர் ஒளி சிகிச்சையாகவும் இது செயல்படுகிறது. அறுவை சிகிச்சையின்போது, தகட்டின் மீதுள்ள ஒளிரும் சாயம், வெறும் கண்ணுக்குத் தெரியாத அகச்சிவப்பு அலைநீளத்தில் ஒளிர்கிறது. இதனால் 44 மைக்ரோமீட்டர் அளவு சிறிய கட்டி செல் கொத்துகளைச் சர்ஜன்கள் காணமுடிகிறது என்று யுடிஎஸ் நானோமெடிசின் பேராசிரியர் டாக்டர் பிங்யாங் ஷி கூறினார். இது தற்போதைய மருத்துவப் படமெடுப்புக் கருவிகளின் தெளிவுத்திறனை மிஞ்சுவதாகும். இந்தப் பொருளில் இணைக்கப்பட்ட ஓர் இலக்கு மூலக்கூறு, இரத்த-மூளைத் தடையைக் கடந்து, கிளையோமா எனப்படும் மூளைக் கட்டி செல்களில் குவிய உதவுகிறது.

கண்ணுக்குத் தெரியும் கட்டியை அகற்றிய பிறகு, அதே பொருள் அறுவை சிகிச்சைக் குழிக்குள் செலுத்தப்பட்டு, மீண்டும் அதே ஒளியால் இயக்கப்படுகிறது. பிளாட்டினம் அணுக்கள், கட்டியிலேயே உள்ள ஹைட்ரஜன் பெராக்சைடு எனும் சேர்மத்தை ஆக்ஸிஜனாக மாற்றி, புற்றுநோய் செல்களைப் பொதுவாகப் பாதுகாக்கும் குறைந்த ஆக்ஸிஜன் சூழலை எதிர்க்கிறது. அதே நேரத்தில், ஒளி வெப்பத்தையும் வினைத்திறன் மிக்க மூலக்கூறுகளையும் உருவாக்கி, அறுவை சிகிச்சையால் அகற்ற முடியாத நுண்ணிய புற்றுநோய் செல்களை அழிக்கிறது. இந்தச் செல்கள்தான் பின்னர் கட்டி மீண்டும் வர காரணமாக அமையக்கூடும்.

குளையோபிளாஸ்டோமா எலி மாதிரிகளில், இந்த முறை அறுவை சிகிச்சைக்குப் பின் கட்டி மீண்டும் வருவதைக் குறைத்தது. சிகிச்சை பெற்ற ஒவ்வொரு எலியும் 60 நாட்களுக்குப் பிறகும் உயிருடன் இருந்தது. அறுவை சிகிச்சை மட்டும் பெற்ற எலிகள் 42 நாட்கள் மட்டுமே உயிர்வாழ்ந்தன. தொடர் பரிசோதனைகளில், இந்தச் சிகிச்சையுடன் தொடர்புடைய நரம்பியல் அல்லது இயக்கக் குறைபாடுகள் எதுவும் கண்டறியப்படவில்லை. இது இதுவரை எலிகளில் மட்டுமே சோதிக்கப்பட்டுள்ளது என்றும், மனிதர்களில் அல்ல என்றும் ஆய்வாளர்கள் தெளிவுபடுத்துகின்றனர். மனித மூளையின் அளவில் இதன் படமெடுப்பு மற்றும் சிகிச்சைத் திறன் இன்னும் உறுதிப்படுத்தப்பட வேண்டும்.