பைபோலார் கோளாறில் மருத்துவமனை அனுமதியை குறைக்குமா ஒசெம்பிக் வகை மருந்துகள்?

நீரிழிவு நோய்க்கும் எடை குறைப்புக்கும் பரவலாகப் பயன்படுத்தப்படும் மருந்து வகையான குளுக்காகன் லைக் பெப்டைட்-1 ரிசெப்டர் அகோனிஸ்ட் (GLP-1RA) மருந்துகள் குறித்து புதிய ஆய்வு ஒன்று வெளியாகியுள்ளது. இதை ஆஸ்திரேலியாவின் கிரிஃபித் பல்கலைக்கழக ஆய்வாளர்கள் நடத்தியுள்ளனர். இந்த மருந்துகள் மனநலத்திற்கும் நன்மை பயக்கக்கூடும் என அந்த ஆய்வு தெரிவிக்கிறது. இது குறிப்பாக பைபோலார் கோளாறு உள்ளவர்களுக்குப் பொருந்தும் என ஆய்வாளர்கள் கூறுகின்றனர். பைபோலார் கோளாறு என்பது, தீவிர மகிழ்ச்சி நிலைக்கும் (மேனியா) கடுமையான மனச்சோர்வுக்கும் இடையே மனநிலை மாறும் ஒரு மனநல கோளாறு ஆகும். நீரிழிவு, உடல் பருமன், பைபோலார் கோளாறு ஆகியவை பெரும்பாலும் ஒன்றாக இருக்கக்கூடும் என்றும், இவற்றுக்குப் பின்னால் ஒரே மாதிரியான உயிரியல் காரணங்கள் இருக்கலாம் என்றும் ஆய்வாளர்கள் தெரிவிக்கின்றனர்.

கிரிஃபித் பல்கலைக்கழகத்தின் மருத்துவம் மற்றும் பல் மருத்துவப் பள்ளியைச் சேர்ந்த பேராசிரியர் மார்க் டேலர் தலைமையிலான ஆய்வாளர் குழு ஸ்வீடன் நாட்டின் தேசிய அளவிலான சுகாதாரத் தரவை ஆய்வு செய்தது. 2009 முதல் 2024 வரையிலான 15 ஆண்டு காலத்தில் GLP-1 மருந்துகள் பரிந்துரைக்கப்பட்ட, பைபோலார் கோளாறு உள்ள கிட்டத்தட்ட 15,000 பேரின் தரவு இதில் இடம்பெற்றது. செமாக்ளூடைடு (Semaglutide) — ஒசெம்பிக் (Ozempic) அல்லது வெகோவி (Wegovy) என்ற பெயரில் அறியப்படும் GLP-1 மருந்து — எடுத்துக் கொண்டிருந்த பைபோலார் கோளாறு உள்ளவர்களை ஆய்வாளர்கள் கவனித்தனர். அவர்கள் அந்த மருந்தை எடுக்காத காலகட்டங்களுடன் ஒப்பிடும்போது, மனநல மருத்துவமனை அனுமதி விகிதம் கணிசமாகக் குறைவாக இருந்ததாக ஆய்வு கண்டறிந்துள்ளது. செமாக்ளூடைடு பயன்பாடு, மனநல மருத்துவமனை அனுமதி ஏற்படும் அபாயத்தை 21 சதவீதம் குறைப்பதுடன் தொடர்புடையதாக இருந்தது என்று இந்த ஆய்வு தெரிவிக்கிறது. இது ஓர் மனநல மருத்துவ ஆய்விதழில் வெளியிடப்பட்டுள்ளது.

இருப்பினும், இந்த நன்மை GLP-1 மருந்து வகை முழுவதும் காணப்படவில்லை. லைராக்ளூடைடு (Liraglutide), டுலாக்ளூடைடு (Dulaglutide) ஆகிய மற்ற இரு GLP-1 மருந்துகளுக்கு மருத்துவமனை அனுமதி அபாயம் குறைவதற்கான தொடர்பு காணப்படவில்லை. இது, சாத்தியமான மனநல நன்மை GLP-1RA வகையின் அனைத்து மருந்துகளுக்கும் பொருந்தாமல் போகலாம் என்பதைக் காட்டுகிறது. மூளையில் ஏற்படும் அழற்சி மற்றும் செல் அழுத்தத்தைக் குறைப்பதன் மூலம் GLP-1 சிக்னலிங் மூளையைப் பாதுகாக்க உதவக்கூடும் என்றும், இது மனநிலை உறுதித்தன்மையை அதிகரிக்க உதவலாம் என்றும் ஆய்வாளர்கள் கூறுகின்றனர். இது இன்னும் ஒரு அனுமானமே தவிர, உறுதி செய்யப்பட்ட காரணம் அல்ல.

இந்தக் கண்டுபிடிப்புகள் இனி ஒரு சமவாய்ப்புச் சோதனையில் பரிசோதிக்கப்பட வேண்டும் என பேராசிரியர் டேலர் நம்பிக்கை தெரிவித்துள்ளார். செமாக்ளூடைடு உண்மையிலேயே பைபோலார் கோளாறு உள்ளவர்களின் மனநல நிலையை மேம்படுத்துகிறதா என்பதை இது உறுதிப்படுத்தும் என அவர் கூறினார். உலக சுகாதார நிறுவனத்தின் (WHO) சமீபத்திய மதிப்பீட்டின்படி, உலகளவில் 200 பேரில் ஒருவர் என்ற விகிதத்தில், அதாவது சுமார் 37 மில்லியன் பேர், பைபோலார் கோளாறுடன் வாழ்கின்றனர்.