பிஎம்ஐ கவனிக்காத ஆரோக்கிய அபாயங்களை இடுப்பு அளவீடு காட்டும்: ஆய்வு

உடல் நிறை குறியீடு (பிஎம்ஐ) மட்டும் கவனிக்காத பருமன் தொடர்பான ஆரோக்கிய அபாயங்களை இடுப்பு சுற்றளவு அளவீடு காட்டும் என ரட்கர்ஸ் ஹெல்த் ஆய்வு கண்டறிந்துள்ளது. இது ஜேஏஎம்ஏ நெட்வொர்க் ஓபன் இதழில் வெளியானது. இடுப்பு சுற்றளவை மட்டும் அல்லது பிஎம்ஐயுடன் சேர்த்து அளப்பதும், பல அளவீடுகளைக் கொண்ட புதிய சிக்கலான முறையைப் போலவே பயனுள்ளதாக இருந்தது என ஆராய்ச்சியாளர்கள் கண்டறிந்தனர்.

தேசிய ஆரோக்கிய, ஊட்டச்சத்து பரிசோதனை ஆய்வில் பங்கேற்ற 20 முதல் 59 வயது வரையிலான 1,900 அமெரிக்க பெரியவர்களின் தரவை ஆய்வு செய்தனர். நேரடியாக உடல் கொழுப்பை மிகச் சரியாக அளக்கும் முறையுடன் ஒப்பிட்டு, பல பருமன் கண்டறிதல் முறைகளைச் சோதித்தனர். சோதிக்கப்பட்ட ஒரு முறை, பிஎம்ஐ, இடுப்பு சுற்றளவு, இடுப்பு-உயர அளவு விகிதம், இடுப்பு-இடுப்பெலும்பு அளவு விகிதம் ஆகியவற்றை இணைத்த புதிதாக முன்மொழியப்பட்ட முறையாகும். அந்த முறை அதிக பேரிடம் கூடுதல் உடல் கொழுப்பைக் கண்டறிந்தாலும், எளிய முறைகளும் கிட்டத்தட்ட அதே அளவு பயனுள்ளதாக இருந்ததைக் குழு கண்டறிந்தது. பிஎம்ஐ அல்லது இடுப்பு சுற்றளவை மட்டும் பயன்படுத்துவது, பருமனைச் சரியாகக் கண்டறிதல் மற்றும் தவறான நேர்மறை கண்டறிதலைத் தவிர்த்தல் ஆகியவற்றுக்கு இடையே ஒரே மாதிரியான சமநிலையை அளித்தது.

முன்மொழியப்பட்ட முறையின் ஒரு அளவீட்டுக்குத் தேவையான இடுப்பெலும்பு சுற்றளவு, வழக்கமான மருத்துவப் பரிசோதனையின்போது அரிதாகவே பதிவு செய்யப்படுகிறது. ஆனால் இடுப்பு சுற்றளவு அளக்க எளிதானது. அது சில மருத்துவ வழிகாட்டுதல்களில் ஏற்கெனவே இடம்பெற்றுள்ளது. "இடுப்பு அளவீடு தேவையான தகவலில் பெரும்பகுதியை அளிக்கிறது. இது மருத்துவர்களுக்கும் நோயாளிகளுக்கும் எளிதானது" என்று ஆய்வின் முதன்மை ஆசிரியரும் ரட்கர்ஸ் ஹெல்த்-ஆர்டபிள்யூஜேபார்னபாஸ் ஹெல்த் மையத்தின் நிபுணருமான ஆயுஷ் விசாரியா கூறினார். பிஎம்ஐ மட்டும் பயன்படுத்தும்போது, உடல் கொழுப்பு அளவுகோல்களின்படி பருமன் உள்ள கணிசமான பேரைக் கண்டறிய முடியவில்லை என்றும் அவர் தெரிவித்தார். உடலில் கொழுப்பு எங்கு சேமிக்கப்படுகிறது என்பதைப் பிஎம்ஐ பிரதிபலிக்காது என்ற நீண்டகால கவலைக்கு இது மேலும் வலு சேர்க்கிறது.

முறையான இடுப்பு அளவீட்டுக்கு முன்பே, ஆடையின் அளவு உடலில் தேவைக்கு அதிகமான கொழுப்பு உள்ளதற்கான ஆரம்ப அறிகுறியாக இருக்கலாம் என்று விசாரியா கூறினார். எடையையும் இடுப்பு அளவையும் கண்காணிப்பது, நீரிழிவு, இதய நோய், பக்கவாதம், சில புற்றுநோய்கள் ஆகியவற்றின் அபாயங்களை முன்கூட்டியே கண்டறிய உதவும் என்றார். சோகோ செடோகுச்சி, ஈதன் ஹால்ம், டக்ளஸ் கோர்சி, டைலன் படேல், கீர்த்தனா கேசவராபு, ஜெஃப்ரி கார்சன் ஆகியோர் இந்த ஆய்வின் இணை ஆசிரியர்கள். அனைவரும் ரட்கர்ஸ் ஹெல்த்தைச் சேர்ந்தவர்கள்.