ஆயுதங்களை பயன்படுத்திய பண்டைய எகிப்திய இளவரசிகள்: எலும்புகள் தரும் சான்று

எகிப்தின் நடு அரசு காலத்து அரச மம்மிகள் மீதான புதிய பரிசோதனை, ஆயுதங்களுடன் புதைக்கப்பட்ட சில பண்டைய எகிப்திய இளவரசிகள், அவற்றை உண்மையில் பயன்படுத்தும் வகையில் உடல் ரீதியாக பயிற்சி பெற்றிருந்தனர் என தெரிவிக்கிறது. வில், அம்பு, குத்துவாள், தண்டாயுதம் ஆகியவை வெறும் சடங்குப் பொருட்கள் அல்ல என இது சுட்டிக்காட்டுகிறது. இந்த ஆய்வு 'ஃப்ரண்டியர்ஸ் இன் என்வைரன்மென்டல் ஆர்க்கியாலஜி' இதழில் வெளியானது.

1890களில் தஹ்ஷூரில் முதன்முதலில் கண்டெடுக்கப்பட்ட ஆறு அரச மம்மிகளை இந்த ஆய்வு மையமாகக் கொண்டது; பிரமிடுகள், குழிக் கல்லறைகளைக் கொண்ட எகிப்திய புதைகுழி வளாகம் இது. பல ஆண்டுகளாக கல்வியாளர்களின் கவனத்தை இழந்திருந்த இந்த எச்சங்கள், 2020-இல் எகிப்திய அருங்காட்சியகத்தில் நடந்த ஒரு பராமரிப்புத் திட்டத்தின்போது மீண்டும் அடையாளம் காணப்பட்டன. ஆறு பேரில் நால்வர், அமெனெம்ஹாத் II மன்னரின் சகோதரிகளும் மகள்களும் ஆவர்; அவர்கள் ஒரே மாதிரியான நிலத்தடி புதைகுழி அறைகளில் வைக்கப்பட்டிருந்தனர். மற்ற இருவர் இளவரசி நூப்-ஹோடெப் மற்றும் மன்னர் ஹோர்.

'அரச குடும்பத்தினர், குறிப்பாக பெண்கள், வில்வித்தை, வேட்டையாடுதல் போன்ற திறமை தேவைப்படும் செயல்பாடுகளில் தீவிரமாக ஈடுபட்டிருந்தனர்' என இந்த ஆய்வின் முதன்மை ஆசிரியர் டாக்டர் செய்னாப் ஹஷெஷ் தெரிவித்தார். 'அவர்களின் கல்லறைகளில் கண்டறியப்பட்ட ஆயுதங்களுக்கு நேரடியாகப் பொருந்தும் வகையில், அதிக தசை பயன்பாட்டைத் தாங்கும் வகையில் அவர்களின் எலும்புகள் வளர்ந்திருந்தது இதற்கு சான்று' என்றும் அவர் கூறினார்.

28 முதல் 34 வயதிற்குள் இறந்த இளவரசி ஈதா, தண்டாயுதம் அல்லது குத்துவாள் போன்ற ஆயுதங்களை வழக்கமாகப் பயன்படுத்தியதைக் காட்டும் வலிமையான மேல் உடல் தசை இணைப்புகளைக் கொண்டிருந்தார். அவரது சவப்பெட்டியில் ஒரு அலங்கார குத்துவாளும் இருந்தது. 20 முதல் 34 வயதிற்குள் இறந்த இளவரசி இட்டாவெரெட், முறிந்த விலா எலும்புகளையும் கால் முறிவுகளையும் தாங்கிக்கொண்டவர்; அவரது எலும்புக்கூடு அவர் திறமையான வில்வீரர் என்பதைக் காட்டுகிறது. இளவரசி நூப்-ஹோடெப், மன்னர் ஹோர் ஆகியோரும் வில்வித்தை பயின்றிருந்ததற்கு ஒப்பிடத்தக்க எலும்பு சான்றுகள் இருந்தன.

ஆறு மம்மிகளிலும் மென்திசுக்கள் சிதைந்திருந்தன; இளவரசிகளின் மண்டை ஓடுகள் உட்பட எலும்புக்கூட்டின் சில பகுதிகள் 1900களின் தொடக்கத்திலிருந்தே காணாமல் போயின. இருப்பினும், ஒவ்வொருவரின் இறப்பு வயது, உயரம், பாலினம், முந்தைய காயங்கள் மற்றும் நோய்களின் சான்றுகளை மதிப்பிட போதுமான எலும்புத் தொகுதி எஞ்சியிருந்தது.