இதயச் செயலிழப்புக்கு AI சிகிச்சை உருவாக்க அமெரிக்கா 62.7 மில்லியன் டாலர் நிதி

ARPA-H, அமெரிக்க அரசின் மேம்பட்ட சுகாதார ஆராய்ச்சிகளுக்கு நிதியளிக்கும் முகவர் நிறுவனம். இதயச் செயலிழப்பு சிகிச்சையை வழிநடத்த உதவும் செயற்கை நுண்ணறிவு பாட்களை உருவாக்க அது 62.7 மில்லியன் டாலர் ஒதுக்க திட்டமிட்டுள்ளது. இந்த வாரம் அறிவிக்கப்பட்ட ADVOCATE எனும் திட்டத்தின் கீழ் இது நடைபெறுகிறது.

நோயாளர்களுக்குச் சிகிச்சை அளிக்க உதவும் பகுதி-தன்னியக்க செயற்கை நுண்ணறிவு கருவிகளை உருவாக்குவதே ADVOCATE திட்டத்தின் நோக்கங்களில் ஒன்று. அமெரிக்க உணவு மற்றும் மருந்து நிர்வாகத்தின் அனுமதியுடன் இவை செயல்படும். அறிகுறிகளின் தீவிரத்தை மதிப்பிடுதல், மருந்து பரிந்துரைத்தல், ஆய்வக பரிசோதனைகளுக்கு உத்தரவிடுதல் ஆகியவை இதில் அடங்கும்.

ஆட்மேன் ஹெல்த், அப்டாக், டெம்பஸ் ஏஐ ஆகிய சுகாதார தொழில்நுட்ப நிறுவனங்களுக்கும், ஸ்டான்ஃபோர்ட், டியூக் பல்கலைக்கழகங்கள் மற்றும் கைசர் பெர்மனெண்டே சுகாதார அமைப்பின் குழுக்களுக்கும் முதல் கட்ட நிதியுதவியை ARPA-H அறிவித்தது. மேலும் குழுக்களுக்கும் நிதியளிக்கக்கூடும் என அது தெரிவித்தது. திட்டத்தின் முதல் ஆண்டுக்கு 33.7 மில்லியன் டாலர் ஒதுக்கப்பட்டுள்ளது. மொத்த 62.7 மில்லியன் டாலரில் மீதமுள்ள தொகை பேரம் பேசி அதிகரிக்கவோ குறைக்கவோ செய்யப்படலாம்.

அமெரிக்காவில் சுமார் 6.7 மில்லியன் பேர் இதயச் செயலிழப்புடன் வாழ்கின்றனர். நிபுணர்களை அணுகுவதில் உள்ள சிரமத்தால் பலருக்கும் சரியான சிகிச்சை கிடைப்பதில்லை. ARPA-H நிதியில் உருவாகும் செயற்கை நுண்ணறிவு முகவர்கள், குறிப்பாக கிராமப்புற மற்றும் சேவை குறைவான பகுதிகளில், இந்த இடைவெளியைக் குறைக்க உதவும் என முகவர் நிறுவனம் நம்புகிறது.