பிரேசில் கட்டுமான தளத்தில் புதிய ராட்சத டைனோசர் இனம் கண்டுபிடிப்பு

பிரேசிலின் வடகிழக்குப் பகுதியில் உள்ள மாரன்யாவோ மாகாணத்தின் டவினோபோலிஸ் நகரில், சாலை-இரயில் முனையக் கட்டுமானப் பணிகளின்போது புதிய ராட்சத டைனோசர் இனம் ஒன்று கண்டறியப்பட்டுள்ளது. இதற்கு டசோசாரஸ் டொகான்டினென்சிஸ் என்று பெயரிடப்பட்டுள்ளது. இந்த ஆய்வு ஜர்னல் ஆஃப் சிஸ்டமேட்டிக் பேலியன்டாலஜி என்ற அறிவியல் இதழில் வெளியிடப்பட்டுள்ளது. பேலியன்டாலஜி என்பது தொல்லுயிர் எச்சங்கள் மற்றும் பழங்கால உயிரினங்களை ஆய்வு செய்யும் அறிவியல் பிரிவு ஆகும். இந்த டைனோசர் சுமார் 20 மீட்டர் நீளம் கொண்டதாகவும், சுமார் 120 மில்லியன் ஆண்டுகளுக்கு முன் வாழ்ந்ததாகவும் கண்டறியப்பட்டுள்ளது.

இந்தத் தொல்லுயிர் எச்சங்கள், சுற்றுச்சூழல் அனுமதி நடைமுறைகளின் ஒரு பகுதியாக கட்டுமானத் தளத்தை கண்காணித்துக் கொண்டிருந்த தொல்பொருள் ஆய்வாளர்களால், தோராயமாக எட்டு மீட்டர் ஆழத்தில் கண்டெடுக்கப்பட்டன. ஆரம்பத்தில் இவை பழங்கால பாலூட்டி விலங்குகளின் எச்சங்கள் என்று தவறாக நினைக்கப்பட்டன. ஃபெடரல் யுனிவர்சிட்டி ஆஃப் தி சாவோ ஃபிரான்சிஸ்கோ வேலி (UNIVASF) பல்கலைக்கழகப் பேராசிரியர் எல்வர் லூயிஸ் மேயர் இந்த எலும்புகளைப் பரிசோதித்தார். எலும்புகள் புதைந்திருந்த ஆழத்தையும், அப்பகுதியின் பாறை அடுக்கின் அறியப்பட்ட வயதையும் வைத்து, இவை மிகவும் பழமையானவை என்று அவர் கண்டறிந்தார். வால் முள்ளெலும்புகள், 1.5 மீட்டர் நீளமுள்ள தொடை எலும்பு, விலா எலும்புகள் மற்றும் கை-கால் எலும்புகள் உள்ளிட்ட இந்த மாதிரி, விதிவிலக்காக முழுமையானதாக உள்ளது. தற்போது இது மாரன்யாவோ மாகாண தலைநகர் சாவோ லூயிஸில் பாதுகாக்கப்பட்டு வருகிறது.

மாரன்யாவோவில் கண்டறியப்பட்ட டைனோசர் இனங்களில் டசோசாரஸ் டொகான்டினென்சிஸ் தான் மிகப் பெரியது. இதற்கு முன் கண்டறியப்பட்ட அமேசான்சாரஸ் மரன்ஹென்சிஸ் போன்ற இனங்கள் சுமார் 10 மீட்டர் நீளம் மட்டுமே கொண்டவை. இதன் நெருங்கிய உறவினர் இனம் தற்போதைய ஸ்பெயின் நாட்டில் வாழ்ந்திருந்தது. இது, அட்லாண்டிக் பெருங்கடலால் இப்போது பிரிக்கப்பட்டுள்ள பகுதிகளில் இந்த டைனோசர்கள் ஒரு பரந்த வம்சாவளியைச் சேர்ந்திருந்திருக்கலாம் என்பதைக் காட்டுகிறது என ஆய்வாளர்கள் தெரிவிக்கின்றனர். இந்த டைனோசர் இனத்தின் மூதாதையர்கள் 140 முதல் 120 மில்லியன் ஆண்டுகளுக்கு முன்பு வட ஆப்பிரிக்கா வழியாக தென் அமெரிக்காவை அடைந்திருக்கலாம் என ஆய்வாளர்கள் கருதுகின்றனர். அந்தக் காலத்தில் இவ்விரு கண்டங்களும் கோண்ட்வானா எனும் மாபெரும் கண்டத்தின் ஒரு பகுதியாக இணைந்திருந்தன.

கட்டுமான நிறுவனத்திடம் இருந்து அனுமதி பெற்று, தளத்தில் மீண்டும் அகழ்வாராய்ச்சியைத் தொடர ஆய்வாளர்கள் தற்போது பேச்சுவார்த்தை நடத்தி வருகின்றனர். இதே விலங்கின் கூடுதல் தொல்லுயிர் எச்சங்கள் அந்த இடத்தில் இன்னும் புதைந்திருக்கலாம் என அவர்கள் கருதுகின்றனர்.