கலபகோஸ் 'மஞ்சள்' கடல் ஆமைகள்: இடம் பெயராமல் ஏன் தங்குகின்றன?

கடல் ஆமைகள் புவியின் காந்தப்புலம், கடல் நீரோட்டங்கள், சூரியன் ஆகியவற்றின் உதவியுடன் உணவைத் தேடி கடல் முழுவதும் சுற்றித் திரிபவை. இனப்பெருக்கத்திற்காக தாங்கள் பிறந்த பகுதிக்கே அவை திரும்பும் என்பதால், இவை அலைந்து திரிபவைகள் என்று பெயர் பெற்றவை. ஆனால் கலபகோஸ் தீவுகளில் உள்ள ஒரு கடல் ஆமைக் குழு இடம்பெயராமல் ஒரே இடத்தில் தங்கியிருப்பது கண்டுபிடிக்கப்பட்டு, விஞ்ஞானிகளை வியப்பில் ஆழ்த்தியது.

இவை 'மஞ்சள் வடிவ' பச்சைக் கடல் ஆமைகள் (செலோனியா மைடாஸ்) எனும் இனத்தின் இரு மரபணு ரீதியாக வேறுபட்ட வடிவங்களில் ஒன்று. இது 'ஃப்ரான்டியர்ஸ் இன் ஆம்பிபியன் அண்ட் ரெப்டைல் சயின்ஸ்' இதழில் வெளியான புதிய ஆய்வில் கூறப்பட்டுள்ளது. ஆல்மா கல்லூரியைச் சேர்ந்த இந்த ஆய்வின் முதன்மை ஆசிரியர் டாக்டர் ஜான் ரோவ் இதைப் பற்றி இவ்வாறு தெரிவித்தார். "மேற்கு பசிபிக் பெருங்கடலில் உள்ள தொலைதூர கடற்கரைகளுக்கு இவை இனப்பெருக்கத்திற்காக இடம்பெயரும் என்று நாங்கள் எதிர்பார்த்தோம். ஆனால் ஆச்சரியப்படும் விதமாக, செயற்கைக்கோள் டேக் பொருத்தப்பட்ட எங்கள் ஆமைகள் எதுவும் மூன்று ஆண்டு ஆய்வு காலத்தில் கலபகோஸ் கடல் காப்பகத்தை விட்டு வெளியேறவே இல்லை."

ஏழு கடல் ஆமை இனங்களில், முதிர்ந்த பருவத்தில் முதன்மையாக தாவர உணவையே உண்ணும் ஒரே இனம் பச்சைக் கடல் ஆமைதான்; இவை கடற்பாசி மற்றும் பாசியை உண்கின்றன. மஞ்சள் வடிவ ஆமைகள் வெப்பமண்டல மேற்கு பசிபிக் பகுதியில் வாழ்கின்றன, கருப்பு வடிவ ஆமைகளோ தென் கலிஃபோர்னியாவுக்குக் கீழே கிழக்கு பசிபிக் பகுதியில் வாழ்கின்றன. இரண்டு வடிவங்களும் ஒன்றாக வாழ்ந்து, ஒரே தாவர உணவை உண்ணும் ஒரே இடம் கலபகோஸ் மட்டுமே. இளம் வயதில் மஞ்சள் வடிவ ஆமைகள் கருப்பு வடிவ ஆமைகளை விட வேகமாக வளர்கின்றன — இது இன்னும் விளக்கப்படாத உடலியல் வேறுபாடுகளை சுட்டிக்காட்டுகிறது.

2015ஆம் ஆண்டில், ரோவ் மற்றும் குழுவினர் கலபகோஸ் கடல் காப்பகத்தில் உள்ள நான்கு தீவுகளுக்கு அருகே ஏழு முதிர்ந்த ஆண் ஆமைகளையும் இரண்டு முதிர்ந்த பெண் ஆமைகளையும் பிடித்து, செயற்கைக்கோள் மூலம் 418 நாட்கள் வரை கண்காணித்தனர். ஆமைகள் பெரும்பாலும் ஆழம் குறைந்த கரையோர நீரிலேயே தங்கியிருந்தன. ஒன்பதில் ஐந்து ஆமைகள் ஒரே தீவுக்கு அருகே தங்கியிருக்க, மற்றவை ஏப்ரல் முதல் அக்டோபர் வரையிலான குளிர்ந்த மாதங்களில் மட்டுமே தீவுகளுக்கு இடையே நகர்ந்தன. ஒரு ஆமையின் சராசரி வாழ்விட வீச்சு 1,498 சதுர கிலோமீட்டர் ஆக இருந்தது, ஆனால் இது ஆமைக்கு ஆமை பெரிதும் மாறுபட்டது.

ஈக்வடாரின் சான் பிரான்சிஸ்கோ டி கிட்டோ பல்கலைக்கழகத்தைச் சேர்ந்த இணை ஆசிரியர் டாக்டர் ஜுவான் பாப்லோ முனோஸ் பெரெஸ் தெரிவிக்கையில், பெண் மஞ்சள் வடிவ ஆமைகள் கலபகோஸ் கடற்கரைகளில் முட்டையிடுவதாக அறியப்படவில்லை. எனவே ஆராய்ச்சியாளர்களின் கருத்துப்படி, அவை இறுதியில் மேற்கு பசிபிக்கில் உள்ள தங்கள் பிறப்பிடக் கடற்கரைகளுக்குத் திரும்பும். இதற்கு மாறாக, சில பெண் கருப்பு வடிவ ஆமைகள் கலபகோஸிலேயே முட்டையிட்டு, ஆண்டு முழுவதும் அங்கேயே தங்கியிருக்கக்கூடும். ஆமைகள் பயன்படுத்தும் ஒவ்வொரு தீவிலும் உணவுத் தளங்களின் தரம் கெடாமல் பாதுகாக்கப்பட வேண்டும் என்று குழுவினர் தெரிவித்தனர்.