எவ்வளவு கடினமாக செய்கிறீர்கள் என்பதை விட, எத்தனை முறை உடற்பயிற்சி செய்கிறீர்கள் என்பதே முக்கியமா?

கல்லூரி மாணவர்கள் எவ்வளவு கடினமாக உடற்பயிற்சி செய்கிறார்கள் என்பதை விட, எத்தனை முறை செய்கிறார்கள் என்பதே மனநல ஆபத்தைக் குறைப்பதில் முக்கியமாக இருக்கலாம் என நோர்வே ஆய்வு தெரிவிக்கிறது. அரிதாக உடற்பயிற்சி செய்த மாணவர்கள், அடுத்த ஆண்டில் மருத்துவ ரீதியாக வரையறுக்கப்பட்ட மனச்சோர்வு, பதற்றம் அல்லது பிற பொதுவான மனநல கோளாறை வளர்த்துக்கொள்ள அதிக வாய்ப்புள்ளதாக ஆய்வாளர்கள் கண்டறிந்தனர். மேற்கு நோர்வே பயன்பாட்டு அறிவியல் பல்கலைக்கழகத்தைச் சேர்ந்த மைக்கேல் கிராஸ்டால்ஸ்மோயன் தலைமையிலான இந்த ஆய்வு, திறந்த அணுகல் ஆய்விதழான பிளாஸ் ஒன்-ல் வெளியானது.

மனச்சோர்வு, பதற்றம் ஆகியவை உலகளவில் இளைஞர்களிடையே இயலாமைக்கு முக்கியக் காரணங்களாக உள்ளன. கல்வித் தேர்ச்சி அழுத்தம், நிதி கவலைகள், வழக்கமான வாழ்க்கை முறை மாற்றம் ஆகியவற்றைக் கொண்டுவரும் உயர்கல்விக் காலம், நோய்த் தடுப்புக்கான முக்கியக் கட்டமாக அமைகிறது. 18 முதல் 35 வயது வரையிலான 10,460 முழு நேர நோர்வே மாணவர்களை ஆய்வாளர்கள் கண்காணித்தனர். ஆய்வு தொடங்கும்போது தாங்கள் எத்தனை முறை, எவ்வளவு கடினமாக, எவ்வளவு நேரம் உடற்பயிற்சி செய்கிறோம் என மாணவர்கள் தெரிவித்தனர். ஓராண்டுக்குப் பின் பொதுவான மனநல கோளாறுகளை மதிப்பிடும் பரிசோதனையை மாணவர்கள் மேற்கொண்டனர்.

ஆரம்பத்தில் குறைவான உடல் செயல்பாடு கொண்டிருந்த மாணவர்கள், பின்னாளில் பதற்றம் அல்லது மனச்சோர்வுக்கான மருத்துவ அளவுகோல்களைப் பூர்த்தி செய்ய அதிக வாய்ப்புள்ளதாக இருந்தனர். ஆய்வு செய்யப்பட்ட அனைத்து அளவீடுகளிலும், உடற்பயிற்சியின் அதிர்வெண் மிகவும் நம்பகமான தொடர்பைக் காட்டியது. பெண்களிடையே குறைந்த உடற்பயிற்சி தீவிரம் பதற்றம், மனச்சோர்வைக் கணித்தது; ஆண்களிடையே குறைந்த வாராந்திர உடற்பயிற்சி கால அளவே வலுவான ஆபத்துக் காரணியாக இருந்தது.

மொத்த வாராந்திர உடற்பயிற்சி அதிகரிக்க அதிகரிக்க பொதுவான மனநல கோளாறு ஏற்படும் வாய்ப்பு குறைந்தது; இது சுமார் வாரத்திற்கு 10 மணி நேரம் வரை தொடர்ந்தது. ஆனாலும், இவ்வளவு நேரம் பயிற்சி செய்ய வேண்டும் என்று இது பொருள்படாது என ஆய்வாளர்கள் தெரிவித்தனர். வாரத்திற்கு குறைந்தது 150 நிமிடங்கள் மிதமான முதல் தீவிரமான உடல் செயல்பாடு தேவை என்ற உலக சுகாதார நிறுவனத்தின் பரிந்துரையையும் இந்த முடிவுகள் ஆதரிக்கின்றன. கடினமான பயிற்சிகளை எப்போதாவது செய்வதை விட, வழக்கமாகச் செய்வதே பரபரப்பான கால அட்டவணை கொண்ட மாணவர்களுக்கு நடைமுறை ரீதியாகச் சிறந்ததாக இருக்கலாம் என ஆய்வு சுட்டிக்காட்டுகிறது.

இது ஒரு கண்காணிப்பு ஆய்வு என்பதால், உடற்பயிற்சியே மனநோயைத் தடுக்கிறது என்பதை இது நிரூபிக்கவில்லை. உடல் செயல்பாடு, மனநலம் இரண்டையும் பிற காரணிகள் பாதிக்கலாம். மனச்சோர்வு அல்லது பதற்றத்தின் ஆரம்ப அறிகுறிகளே உடற்பயிற்சியைக் கடினமாக்கியிருக்கவும் வாய்ப்புண்டு. "மாணவர்களை உடல் ரீதியாக சுறுசுறுப்பாக வைத்திருப்பது சிறந்த மனநலத்திற்கு உதவக்கூடும்", என ஆசிரியர்கள் எழுதியுள்ளனர். இது ஆரோக்கியமான கல்விச் சூழலின் முக்கிய பகுதியாகக் கருதப்பட வேண்டும் என்றும் அவர்கள் குறிப்பிட்டனர்.