தாய்க்கு எதிரான இணையர் வன்முறை: குழந்தைகளின் உயிருக்கும் ஆபத்து

தாய்மார் தங்கள் துணையிடமிருந்து வன்முறையை எதிர்கொள்ளும்போது, அவர்களது குழந்தைகள் ஐந்து வயதை எட்டும் முன் இறக்கும் வாய்ப்பு அதிகரிக்கிறது என கர்டின் பல்கலைக்கழகம் தலைமையிலான ஒரு முறையான மறுஆய்வு கண்டறிந்துள்ளது. இது ஜேஏஎம்ஏ நெட்வொர்க் ஓபன் இதழில் வெளியிடப்பட்டது. உலகெங்கிலும் உள்ள 28 ஆய்வுகளில் இருந்து 684,000க்கும் மேற்பட்ட பெண்கள் மற்றும் குழந்தைகளின் தரவை இது ஒருங்கிணைத்தது. இது இதுபோன்ற மிகப் பெரிய மறுஆய்வுகளில் ஒன்றாகும்.

மற்ற பெண்களுடன் ஒப்பிடும்போது, இணையர் வன்முறையை எதிர்கொண்ட பெண்களுக்கு, ஐந்து வயதுக்குள் ஒரு குழந்தையை இழக்கும் வாய்ப்பு 10% அதிகமாக இருந்தது. முதல் பிறந்தநாளுக்கு முன் குழந்தை இறக்கும் வாய்ப்பு 32% அதிகமாக இருந்தது. பிறந்த முதல் மாதத்திலேயே குழந்தையை இழக்கும் வாய்ப்பு 36% அதிகமாக இருந்தது. "பெண்களுக்கு எதிரான வன்முறை பெண்களுக்கு மட்டும் தீங்கு விளைவிப்பதில்லை. இது குழந்தைகள் மற்றும் சிறாருக்கும் கடுமையான விளைவுகளை ஏற்படுத்தும்" என்று பெரெகெட் கெஃபாலே தெரிவித்தார். இவர் முதன்மை ஆசிரியரும், கர்டின் பல்கலைக்கழக முனைவர் பட்ட மாணவரும் ஆவார். "இணையர் வன்முறையைத் தடுப்பது, பெண்களின் நலனை மேம்படுத்துவதோடு, குழந்தைகளின் உயிரையும் காக்க உதவும் என எங்கள் கண்டுபிடிப்புகள் காட்டுகின்றன" என்றும் அவர் கூறினார்.

உடல், பாலியல், உணர்ச்சி ரீதியான வன்முறைகள் அனைத்துமே பிறந்த குழந்தைகள் இறக்கும் அதிக வாய்ப்புடன் தொடர்புடையவை என ஆய்வு கண்டறிந்தது. உடல் ரீதியான வன்முறை, முதல் பிறந்தநாளுக்கு முன் குழந்தைகள் இறக்கும் அதிக வாய்ப்புடன் தொடர்புடையது. வன்முறையை எதிர்கொள்ளும் பெண்கள் காயம், மனநல சிக்கல்கள், மருத்துவ உதவி பெறுவதில் சிரமங்கள், கர்ப்ப மற்றும் பிரசவ காலத்தில் சிக்கல்களை எதிர்கொள்ள அதிக வாய்ப்புள்ளது என கெஃபாலே தெரிவித்தார். இவை அனைத்தும் குழந்தையின் ஆரோக்கியத்தையும் உயிர்வாழ்வையும் பாதிக்கலாம். தேவையான சேவைகளை அணுகுவதைக் கட்டுப்படுத்தி, பாதுகாப்பான வீட்டுச் சூழலைச் சீர்குலைப்பதன் மூலமும் வன்முறை குழந்தையைப் பாதிக்கலாம்.

குழந்தை இறப்புகளைக் குறைக்கும் முயற்சிகள் பொதுவாக மருத்துவ சேவை, ஊட்டச்சத்து, தடுப்பூசி ஆகியவற்றை மேம்படுத்துவதில் மட்டுமே கவனம் செலுத்துகின்றன என்று மூத்த ஆசிரியர் கிசாச்செவ் டெசெமா தெரிவித்தார். பெண்களுக்கு எதிரான வன்முறையைத் தடுப்பதும் அந்த முயற்சிகளின் ஒரு பகுதியாக இருக்க வேண்டும் என்றும் அவர் கூறினார். இவர் கர்டின் பல்கலைக்கழக மக்கள்தொகை நல்வாழ்வு பள்ளியில் இணைப் பேராசிரியர் ஆவார். இணை ஆசிரியர் ஜாக்குலின் ஹென்ட்ரிக்ஸ் கூற்றுப்படி, கர்ப்ப காலத்திலும் ஆரம்பகால தாய்மையிலும் இணையர் வன்முறைக்கான வழக்கமான பரிசோதனையை இந்தக் கண்டுபிடிப்புகள் பரிந்துரைக்கின்றன. வலுவான சட்டப் பாதுகாப்பும், வன்முறையை எதிர்கொள்ளும் பெண்களுக்கான சிறந்த ஆதரவும் தேவை என்றும் இவை காட்டுகின்றன.