'ஜாம்பி' செல்கள் நாள்பட்ட அழற்சியைத் தூண்டுவது எப்படி? புதிய கண்டுபிடிப்பு

வயதாகும்போது, செயலிழந்த 'ஜாம்பி' செல்கள் உடலில் திரள்கின்றன; இவை பிரிவதை நிறுத்திவிட்டாலும் வளர்சிதை ரீதியாக இன்னும் செயலில் இருந்து, அழற்சி மூலக்கூறுகளை வெளியிடுகின்றன. இவை மூப்பு, இதயநோய், புற்றுநோய், நரம்பியல் சிதைவு ஆகியவற்றுடன் தொடர்புடைய நீடித்த அழற்சிக்குப் பங்களிக்கின்றன. இந்த வயதான செல்கள் தங்கள் அழற்சி மரபணுக்களை மிக உயர் செயல்பாட்டு நிலைக்கு எப்படி மாற்றுகின்றன என்பதை விளக்கும் முன்னர் அறியப்படாத ஒரு வழிமுறையை மேயோ கிளினிக் ஆய்வாளர்கள் கண்டறிந்துள்ளனர். இவர்கள் சான்ஃபோர்டு பர்ன்ஹாம் ப்ரெபிஸ் மருத்துவ கண்டுபிடிப்பு நிறுவனத்துடன் இணைந்து பணியாற்றினர் என நேச்சர் இதழில் வெளியான ஆய்வு தெரிவிக்கிறது.

மூத்த ஆசிரியர் ஜோவாவ் பாஸோஸ் தலைமையிலான ஆய்வகத்தின் முந்தைய ஆய்வு ஒன்று, சேதமடைந்த மைட்டோகாண்ட்ரியா - செல் ஆற்றலை உற்பத்தி செய்யும் அமைப்புகள் - தங்கள் டிஎன்ஏ, ஆர்என்ஏவைச் செல்லுக்குள் கசியவிடுவதைக் காட்டியிருந்தது. இந்த இடம்பிசகிய மூலக்கூறுகள், அழற்சியை ஊக்குவிக்கும் நோய்எதிர்ப்பு பாதைகளைத் தூண்டுகின்றன. இந்த அழற்சி எச்சரிக்கை செயல்முறையின் ஒரு பகுதி மட்டுமே என புதிய ஆய்வு காட்டுகிறது. "நோய்எதிர்ப்பு சிக்னல் மட்டும் போதாது என்பதைக் கண்டறிந்தோம்" என முதன்மை ஆசிரியர் ஹெலென் மார்ட்டினி தெரிவித்தார். "அழற்சி மரபணுக்கள் எப்படி இயக்கப்படுகின்றன என்பதை மாற்றும் ஒரு வளர்சிதை மாற்ற சிக்னலும் செல்களுக்குத் தேவை" என்றார்.

இந்த இரண்டாவது சிக்னலில் அசிட்டைல்-கோஏ (acetyl-CoA) எனும் மூலக்கூறு ஈடுபடுகிறது; இது மைட்டோகாண்ட்ரிய வளர்சிதை மாற்றத்தால் உருவாகிறது. ஜாம்பி செல்கள் அதிக அசிட்டைல்-கோஏவை உருவாக்குகின்றன; இது எபிஜெனெடிக் மாற்றங்களுக்கு உதவுகிறது - அதாவது டிஎன்ஏ வரிசையை மாற்றாமலேயே மரபணுக்கள் செயலிலிருக்குமா என்பதை நிர்ணயிக்கும் வேதி மாற்றங்கள். இவை அழற்சி மரபணுக்களை படிக்கும் செல் இயந்திரத்திற்கு மேலும் அணுகக்கூடியதாக ஆக்குகின்றன.

தலையீடு செய்யக்கூடிய ஒரு புள்ளியையும் ஆய்வாளர்கள் கண்டறிந்தனர்: SLC25A1 எனப்படும் மைட்டோகாண்ட்ரிய போக்குவரத்து புரதம், இந்த எபிஜெனெடிக் மாற்றங்களுக்குத் தேவையான அசிட்டைல்-கோஏவை வழங்குவதில் ஈடுபடுகிறது. SLC25A1 புரதத்தைத் தடுத்தது கிடைக்கும் அசிட்டைல்-கோஏவைக் குறைத்து, அழற்சி மரபணுக்களின் செயல்பாட்டைக் கட்டுப்படுத்தியது; அசல் நோய்எதிர்ப்பு சிக்னல்கள் இன்னும் இருந்த போதிலும் இது நிகழ்ந்தது.

"பல ஆண்டுகளாக, இத்துறை ஜாம்பி செல்களை அகற்றுவதிலேயே கவனம் செலுத்தி வந்தது" என பாஸோஸ் தெரிவித்தார். "எங்கள் அணுகுமுறை வேறுபட்டது. செல்களைக் கொல்வதற்குப் பதிலாக, அவற்றை தீங்கு விளைவிக்கும்படி ஆக்கும் அழற்சியை அணைக்க முடியுமா என நாங்கள் கேட்டோம்" என்றார்.