யானை, நீர்யானை இனங்கள் மெதுவாக அழிந்ததற்குக் காரணம் கண்டறிந்த ஆய்வு

யானைகள், நீர்யானைகள் மற்றும் அவற்றின் அழிந்துபோன உறவினர்கள் உள்ளிட்ட ஆப்பிரிக்காவின் பெரும் தாவர உண்ணிகள் படிப்படியாக வீழ்ச்சியடைந்தன. இதற்குக் காரணம் அவற்றின் மாபெரும் உடல் அளவு அல்ல. மறைந்த இனங்களுக்குப் பதிலாகப் புதிய இனங்கள் தோன்றும் வேகம் மிக மெதுவாக இருந்ததே முக்கியக் காரணம் என புதிய ஆய்வு ஒன்று தெரிவிக்கிறது. நேச்சர் கம்யூனிகேஷன்ஸ் இதழில் வெளியான இந்த ஆய்வை ஸ்பெயினின் தேசிய இயற்கை அறிவியல் அருங்காட்சியகம் (MNCN-CSIC), மனிதப் பரிணாம தேசிய ஆய்வு மையம் (CENIEH) மற்றும் அல்கலா பல்கலைக்கழக ஆய்வாளர்கள் மேற்கொண்டனர்.

கடந்த 23 மில்லியன் ஆண்டுகளில் ஆப்பிரிக்காவில் வாழ்ந்த நீர்யானை, மான்வகை, ஒட்டகச்சிவிங்கி உள்ளிட்ட 396 தாவர உண்ணி இனங்களைச் சேர்ந்த 3,327 தொல்லுயிர் எச்சங்களை ஆய்வுக் குழு பரிசோதித்தது. உடல் எடை, பல் உயரம், சூழல் மாற்றங்கள் ஆகியவற்றை அடிப்படையாகக் கொண்டு ஆய்வாளர்கள் பகுப்பாய்வு செய்தனர். அழிவு விகிதமும் புதிய இனங்கள் தோன்றும் வேகமும் காலப்போக்கில் எப்படி மாறின என்பதை நியூரல் நெட்வொர்க் மாடல்கள் மூலம் மதிப்பிட்டனர்.

முன்பு நினைக்கப்பட்டதற்கு மாறாக, பெரிய இனங்கள் சிறிய இனங்களைவிட வேகமாக அழியவில்லை என்றும், உண்மையில் அவற்றின் அழிவு விகிதம் சற்று குறைவாகவே இருந்தது என்றும் MNCN ஆய்வாளர் ஹுவான் லோபெஸ் கண்டலபியேத்ரா தெரிவித்தார். பெரும் தாவர உண்ணி இனங்கள் புதிய இனங்களை உருவாக்கும் வேகம் மிக மெதுவாக இருந்ததே முக்கியக் காரணம் என அவர் விளக்கினார். ஆப்பிரிக்கா மிகவும் வறண்டிருந்த காலகட்டங்களில், 45 கிலோகிராமுக்கும் குறைவான எடை கொண்ட விலங்குகள், ஒரு டன்னுக்கும் அதிக எடை கொண்டவற்றைவிட வெறும் 15% வேகமாக மட்டுமே அழிந்தன. ஆனால் அவை 2.2 மடங்கு வேகத்தில் புதிய இனங்களை உருவாக்கின.

சுமார் 7.2 மில்லியன் ஆண்டுகளுக்கு முன்பிருந்து ஆப்பிரிக்கா படிப்படியாக வறண்டு, காடுகளுக்குப் பதிலாக திறந்தவெளிப் புல்வெளிகள் உருவாகின. சுமார் 3.6 மில்லியன் ஆண்டுகளுக்கு முன்பு, பெரும் தாவர உண்ணிகளிடையே புதிய இனங்கள் தோன்றும் வேகம் தேங்கிவிட்டது. பின்னர், 2.58 மில்லியன் ஆண்டுகளுக்கு முன் தொடங்கிய ப்ளீஸ்டோசீன் காலத்தின் ஆரம்பத்தில் அழிவு விகிதம் கடுமையாக உயர்ந்தது. மனிதர்கள் இவ்வளவு பெரிய விலங்குகளை வேட்டையாடும் தொழில்நுட்பம் பெறுவதற்கு மில்லியன் கணக்கான ஆண்டுகளுக்கு முன்பே இது நடந்தது. கீழ்த் தாடையிலிருந்து கீழ்நோக்கி வளைந்த தந்தங்களைக் கொண்ட யானை இன உறவினரான டீனோதீரியம் (Deinotherium) அவற்றில் ஒன்று. தற்கால நீர்யானைகளின் உறவினரான பன்றி போன்ற ஆந்திரகோதீரியிடே (Anthracotheriidae) குடும்பமும் அழிந்தவற்றில் அடங்கும்.

சமீபத்திய சில அழிவுகளுக்கு மனித செயல்பாடுகள் ஓரளவு பங்களித்திருக்கலாம். ஆனால் இந்தப் பெரும் தாவர உண்ணிகளின் பரவலான இழப்புக்கு அதுவே முக்கியக் காரணம் அல்ல என CENIEH நிறுவனத்தைச் சேர்ந்த இக்நாசியோ ஏ. லாசகபாஸ்டர் தெரிவித்தார்.