324 மில்லியன் ஆண்டு பழமையான 24 கால் தொல் பூச்சி — நிலவாழ்வின் தொடக்கம்

324 மில்லியன் ஆண்டுகள் பழமையான, 24 கால்களைக் கொண்ட ஒரு தொல்லுயிர் பூச்சியின் புதிய பகுப்பாய்வு, பண்டைய உயிரினங்கள் நீரிலிருந்து நிலத்திற்கு எவ்வாறு மாறின என்பதற்கான புதிய சான்றுகளை அளிக்கிறது. இந்த ஆய்வு நேச்சர் இதழில் வெளியானது.

டெக்சாஸில் முதலில் கண்டெடுக்கப்பட்ட இந்தத் தொல்லுயிர் எச்சத்திற்கு "சோஷா ப்ரேகர்சர்" எனப் பெயரிடப்பட்டது. இதன் பிரிவுபட்ட வயிற்றுப் பகுதி உறுப்புகள் க்ரஸ்டேசியன் (crustacean) இன அமைப்புக்கு ஒத்திருந்ததால், முன்பு இது ஒரு வகை பண்டைய க்ரஸ்டேசியனாகவே வகைப்படுத்தப்பட்டிருந்தது. சீன அறிவியல் அகாடமியின் நான்ஜிங் புவியியல் மற்றும் தொல் உயிரியல் நிறுவனத்தைச் சேர்ந்த ஆய்வாளர்கள் தலைமையிலான சர்வதேசக் குழு, பிரிட்டன், அமெரிக்கா, ஸ்பெயின் நாட்டு ஆய்வாளர்களுடன் இணைந்தது. இந்த தொல்லுயிர் எச்சத்தை குறுக்கு-முனைவு ஒளியின் கீழ் மீண்டும் ஆய்வு செய்தனர். இது அதன் அமைப்பை இன்னும் தெளிவாகக் காட்டியது.

இந்தப் புதிய ஒளியில், நவீன பூச்சிகளின் உடல் அமைப்புக்கே உரிய அம்சங்களை ஆய்வாளர்களால் காண முடிந்தது — மூன்று தனித்த மார்புப் பிரிவுகளும், மூன்று ஜோடி கால்களும். ஆனால் இந்தத் தொல்லுயிர் எச்சத்தின் வயிற்றுப் பகுதியில் இன்னும் ஒன்பது ஜோடி உறுப்புகள் முளைத்திருந்தன. இவை நடப்பதற்காக அல்ல, நீரில் பயன்படுத்துவதற்காக அமைந்திருந்தவை போலத் தெரிகின்றன.

"இந்தக் கண்டுபிடிப்பு நீர் மற்றும் நிலவாழ் உயிரினங்களுக்கு இடையேயான பரிணாம பாலமாகச் செயல்படுகிறது" என நான்ஜிங் நிறுவனத்தின் காய் செங்யாங் தெரிவித்தார். "சுமார் 320 மில்லியன் ஆண்டுகளுக்கு முன்பு, நீர்-நிலம் சந்திக்கும் பகுதியில் வாழ்ந்த பண்டைய பூச்சிகள், நிலத்தில் மூச்சுவிடவும் நகரவும் ஏற்ற புதிய உடல் அமைப்புகளை படிப்படியாக உருவாக்கி வந்தன" என்றும் அவர் கூறினார்.

இந்த மாதிரி ஒரு வளர்ந்த பெண் பூச்சி ஆகும். இதன் நீளம் 3.2 சென்டிமீட்டர் (1.3 அங்குலம்). வாலை நீட்டினால் சுமார் 5 சென்டிமீட்டர் (2 அங்குலம்) ஆகும். நீரும் நிலமும் சந்தித்த ஒரு பகுதியில் இது கிடைத்தது. இந்த வாழ்விடமே அதன் பரிணாம வளர்ச்சியில் முக்கியப் பங்காற்றியிருக்கக்கூடும் என ஆய்வாளர்கள் கூறுகின்றனர்.

இந்தப் பூச்சி இனம் நீரின்றி நிலத்தில் வாழக்கூடிய நிலையை அடைந்தவுடன், நீருக்கேற்ற கூடுதலான 18 உறுப்புகள் தலைமுறை தலைமுறையாக இழக்கப்பட்டன என ஆய்வாளர்கள் தெரிவிக்கின்றனர். இதன் விளைவாகவே இன்றைய பூச்சிகள் தாங்கியிருக்கும் ஆறு கால் உடல் அமைப்பு உருவானது.