கொதிக்கும் தேநீர், காபி உணவுக்குழாய் புற்றுநோய் அபாயத்தை உயர்த்துமா?

மிகவும் சூடான தேநீர் அல்லது காபி அருந்துவது உணவுக்குழாய் புற்றுநோய் அபாயத்தை உயர்த்துவதாக பல ஆய்வுகள் தொடர்ந்து காட்டி வருகின்றன. ஆசியா, மத்திய கிழக்கு, ஆப்பிரிக்கா, தென் அமெரிக்கா ஆகிய பகுதிகளில் இதற்கு முன் இந்தத் தொடர்பு காணப்பட்டது. இது மேற்கத்திய மக்களிலும் உண்மையானது என்பதை ஆக்ஸ்·ஃபோர்டு பல்கலைக்கழகத்தின் நஃபீல்டு மக்கள்தொகை நல்வாழ்வுத் துறையின் புதிய ஆய்வு உறுதிசெய்துள்ளது. இது இன்டர்நேஷனல் ஜர்னல் ஆஃப் கேன்சர் இதழில் வெளியானது.

யூகே பயோபேங்க் மற்றும் 50 முதல் 64 வயது பெண்களை உள்ளடக்கிய மில்லியன் விமன் ஸ்டடி ஆகிய ஆய்வுத் தொகுப்புகளிலிருந்து ஆய்வாளர்கள் தரவுகளைப் பெற்றனர். இவை செதிள்செல் புற்றுநோய் (SCC) எனும் ஒரு வகை உணவுக்குழாய் புற்றுநோயின் கண்டறிதல்களைப் பதிவு செய்திருந்தன. தனியே நடத்தப்பட்ட ஒரு பிரிட்டிஷ் கணக்கெடுப்பில், சுமார் ஒரு மில்லியன் பேரில் 15% பேர் தங்கள் தேநீர் அல்லது காபியை 'மிகவும் சூடாக' விரும்புவதாகக் கூறினர்.

தங்கள் பானங்களை மிகவும் சூடாக விரும்பியவர்களுக்கு, 'வெதுவெதுப்பாக' விரும்பியவர்களைவிட மூன்று மடங்கு அதிகமாக பின்னாளில் உணவுக்குழாய் SCC கண்டறியப்பட்டது; இது தேநீரா காபியா என்பதைப் பொருட்படுத்தாமல் பொருந்தியது. சில நிமிடங்கள் காத்திருந்து பானத்தைக் குளிர்விக்க அனுமதித்தால், ஏழு SCC உணவுக்குழாய் புற்றுநோய்களில் ஒன்றைத் தடுக்க முடியும் என ஆய்வாளர்கள் மதிப்பிடுகின்றனர்.

கேன்சர் ரிசர்ச் யூகே தகவலின்படி, பிரிட்டனில் ஆண்டுக்கு சுமார் 10,000 உணவுக்குழாய் புற்றுநோய் பாதிப்பு நிகழ்வுகள் கண்டறியப்படுகின்றன. இவற்றில் மூன்றில் ஒரு பங்கு SCC வகையைச் சேர்ந்தவை; அதாவது ஆண்டுக்கு சுமார் 500 பாதிப்பு நிகழ்வுகளைத் தடுக்க முடியும். இந்த நோய்க்கான ஐந்தாண்டு உயிர்வாழ்வு விகிதம் 30%க்கும் சற்றே குறைவு.

சீனாவில் தேநீர் அருந்துவோர் மீதான தனி ஆய்வு ஒன்று வேறு விவரம் தந்தது. வெதுவெதுப்பான, சூடான, கொதிக்கும் வெப்பநிலைகளில் தினமும் தேநீர் அருந்திய ஆண்களுக்கு, தினமும் தேநீர் அருந்தாதவர்களைவிட முறையே 17%, 30%, 55% அதிக உணவுக்குழாய் புற்றுநோய் அபாயம் இருந்தது.