ஆரம்பகால விண்மீன் திரள்கள் நான்கு மடங்கு பாரமா? JWST கண்டுபிடிப்பு

நாசாவின் ஜேம்ஸ் வெப் விண்வெளி தொலைநோக்கியை (JWST) பயன்படுத்திய வானியலாளர்கள், பேரண்டத்தின் ஆரம்பகாலத்தில் தோன்றிய மிகப் பெரிய விண்மீன் திரள்களில் எதிர்பார்த்ததை விட அதிக எண்ணிக்கையிலான சிறிய, மங்கலான நட்சத்திரங்கள் இருப்பதைக் கண்டறிந்துள்ளனர். இதனால் அந்த திரள்கள் முந்தைய மதிப்பீட்டை விட நான்கு மடங்கு வரை பாரமானவையாக இருக்கலாம். பென் ஸ்டேட் பல்கலைக்கழக ஆய்வாளர்களும் இணைந்த இந்த ஆய்வை லெய்டன் பல்கலைக்கழகம் தலைமையேற்று நடத்தியது; முடிவுகள் நேச்சர் அஸ்ட்ரானமி (Nature Astronomy) இதழில் வெளியிடப்பட்டன.

பில்லியன் ஆண்டுகளுக்கு முன்பே புதிய நட்சத்திரங்களை உருவாக்குவதை நிறுத்திய, முதிர்ச்சியடைந்த ஒன்பது பாரிய விண்மீன் திரள்களை ஆய்வுக் குழு பரிசோதித்தது. JWST இன் கண்காணிப்புகளை, முந்தைய வெரி லார்ஜ் டெலஸ்கோப் (Very Large Telescope) தரவுகளுடன் இணைத்து ஆய்வு செய்தனர். ஒவ்வொரு திரளின் ஒளியையும் நிறமாலையாகப் பிரிப்பதன் மூலம், இவ்வளவு தொலைவில் உள்ள திரள்களில் சிறிய, மங்கலான நட்சத்திரங்களுக்கும் பெரிய, பிரகாசமான நட்சத்திரங்களுக்கும் இடையேயான விகிதத்தை முதன்முறையாக மதிப்பிட முடிந்தது. திரளின் ஒளியில் பிரகாசமான நட்சத்திரங்களே மேலோங்கி இருப்பதால், மங்கலான சிறிய நட்சத்திரங்களைக் கண்டறிவது கடினமாக இருந்தது.

பேரண்டத் தோற்றத்திற்குப் பிறகு ஒன்றரை பில்லியன் ஆண்டுகளுக்குள் உருவாகியிருக்கக்கூடிய ஒரு திரள் மற்றவற்றை விடத் தனித்து நின்றது; அது முந்தைய கணக்கீட்டை விட நான்கு மடங்கு வரை பாரமானதாக இருக்கலாம் என லெய்டன் பல்கலைக்கழக ஆய்வு மாணவரும் இணை ஆசிரியருமான மார்ட்யே ஸ்லோப் தெரிவித்தார். திரளின் பிரகாசமான நட்சத்திரங்களுக்குப் பின்னால் அதிக எண்ணிக்கையிலான சிறிய நட்சத்திரங்கள் மறைந்திருப்பதைத் தங்கள் மாதிரிகள் காட்டுவதாக, லெய்டன் பல்கலைக்கழகத்தில் சமீபத்தில் முனைவர் பட்டம் பெற்ற முதன்மை ஆசிரியர் க்ளோயி செங் தெரிவித்தார்.

பேரண்டம் முழுவதும் நட்சத்திரங்கள் ஒரே விகிதத்தில் உருவாகும் என்ற நீண்டகால கருதுகோளுக்கு மாறாக, பாலாறு போன்ற சிறிய திரள்களை விட ஆரம்பகால பாரிய திரள்களில் குறை-நிறை நட்சத்திரங்களின் பங்கு மிக அதிகமாக இருப்பதை ஆய்வாளர்கள் கண்டறிந்தனர். பெரும்பாலான கோள்கள் குறை-நிறை நட்சத்திரங்களைச் சுற்றி வருவதால், பேரண்டத்தின் ஆரம்பகாலத்தில் இதற்கு முன் நினைத்ததை விட அதிகமான கோள்கள் உருவாகியிருக்கலாம் என ஆய்வுக்குத் தலைமை தாங்கிய லெய்டன் வானியல் நிலைய பேராசிரியர் மரிஸ்கா க்ரீக் தெரிவித்தார்.

பேரண்டத்தின் இன்னும் முந்தைய காலகட்டங்களைச் சேர்ந்த திரள்களை ஆய்வு செய்யவும் இதே தொழில்நுட்பத்தைப் பயன்படுத்த ஆய்வாளர்கள் திட்டமிட்டுள்ளனர்.