பலவகைத் தாவர மேய்ச்சல் பால், இறைச்சி, மனித இரத்தத்தை மாற்றுமா?

நியூசிலாந்தில் ஆடு, மாடு, மான் ஆகியவற்றை ஒரே வகை புல்லுக்குப் பதிலாக பலவகைத் தாவரங்கள் கலந்த மேய்ச்சல் நிலத்தில் வளர்க்கின்றனர். இதனால் அவற்றிலிருந்து கிடைக்கும் பால், மாட்டிறைச்சி, ஆட்டிறைச்சி, மான் இறைச்சியின் உயிர்வேதியியல் கூறுகள் மாறுகின்றன. இதை நியூசிலாந்து ஆராய்ச்சியாளர்கள் கண்டறிந்துள்ளனர். புதிய மனித உணவு சோதனைகளில், இந்த இறைச்சியை உண்பவர்களின் இரத்தத்திலும் மாற்றங்கள் ஏற்பட்டதாக அவர்கள் தெரிவிக்கின்றனர்.

பலவகைத் தாவரங்களை ஒரே இடத்தில் இணைக்கும் இந்த முறைக்கு 'ஃபங்க்ஷனல் டைவர்சிட்டி' என்று பெயர். வழக்கமான ஒரே வகைப் புல் நிலங்களுக்குப் பதிலாக, புற்கள், இலைத்தாவரங்கள் (ப்ளான்டெயின், சிக்கரி), பயறு வகைத் தாவரங்கள் (அல்பால்பா, க்ளோவர்) ஆகியவை இதில் இணைக்கப்படுகின்றன. ஆய்வகச் சோதனைகளில், வழக்கமான, பலவகைத் தாவர, ஃபங்க்ஷனல் டைவர்சிட்டி ஆகிய மூன்று மேய்ச்சல் முறைகளையும் ஆடு, மாடு, மானில் ஒப்பிட்டனர். வளர்ச்சி, தீவனத் திறன், பால் உற்பத்தி, விலங்குகளின் நல்வாழ்வு ஆகியவை மேம்பட்டதாகக் கண்டறியப்பட்டது. ஃபங்க்ஷனல் டைவர்சிட்டி முறையில், சுற்றுச்சூழலுக்குச் செல்லும் நைட்ரஜன் இழப்பு ஆடுகளில் சுமார் 30%-ம், பால் மாடுகளில் 42%-ம் குறைந்தது.

மெட்டபோலோமிக்ஸ் எனப்படும் நுட்பத்தைப் பயன்படுத்தி இந்தக் குழு பாலையும் இறைச்சிகளையும் ஆய்வு செய்தது. உடலின் வேதி மாற்றங்களால் உருவாகும் ஆயிரக்கணக்கான சிறு மூலக்கூறுகளான 'மெட்டபோலைட்'களை அளவிடும் நுட்பம் இது. ஃபங்க்ஷனல் டைவர்சிட்டி மேய்ச்சல் நிலத்தில் வளர்ந்த மாடுகளின் பாலில், கொழுப்பை எரிசக்தியாக மாற்ற உதவும் சேர்மங்கள் அதிக அளவில் இருந்தன. சிவப்பு அணுக்கள் மற்றும் மனநிலைக்குத் தொடர்புடைய மூளை வேதிப்பொருட்களுக்கு உதவும் சேர்மங்களும் அதிகமாக இருந்தன. மேலும், இதய நோய் மற்றும் டிமென்ஷியா அபாயத்துடன் தொடர்புடைய ஒரு சேர்மத்தின் அளவு பாதியாகக் குறைந்திருந்தது.

ஃபங்க்ஷனல் டைவர்சிட்டி நிலத்தில் மேய்ந்த மான்களின் இறைச்சியில்தான் மிகப்பெரிய மாற்றங்கள் காணப்பட்டன. ஆக்ஸிஜனேற்ற எதிர்ப்பு, அழற்சி எதிர்ப்புச் சேர்மங்கள் 27 மடங்கு அதிகரித்தன. உடல் அழுத்த சமநிலையைக் கட்டுப்படுத்தும் மெட்டபோலைட்கள் 59 மடங்கு அதிகரித்தன. இதே முறையில் வளர்க்கப்பட்ட ஆடு, மாட்டிறைச்சிகளிலும், ஆக்ஸிஜனேற்ற எதிர்ப்பு, இதய-மனநல நன்மைகள், புற்றுநோய் எதிர்ப்புத் தன்மை, சிறந்த ஊட்டச்சத்து உறிஞ்சுதல் ஆகியவற்றுடன் தொடர்புடைய சேர்மங்கள் அதிகரித்தன.

மக்கள் மீது இதன் தாக்கத்தைச் சோதிக்க, ஆராய்ச்சியாளர்கள் இதுவரை இல்லாத முதல் சமவாய்ப்பு உணவு சோதனையை நடத்தியதாகத் தெரிவிக்கின்றனர். ஒவ்வொரு பங்கேற்பாளரும் வழக்கமான, பலவகைத் தாவர, ஃபங்க்ஷனல் டைவர்சிட்டி ஆகிய மூன்று முறைகளிலும் வளர்க்கப்பட்ட மாட்டிறைச்சி அல்லது ஆட்டிறைச்சியை உண்டனர். ஒவ்வொரு முறையும் உணவுக்கு முன்னும் பின்னும் இரத்தம் பரிசோதிக்கப்பட்டது. ஃபங்க்ஷனல் டைவர்சிட்டி மாட்டிறைச்சியை உண்டவர்களின் இரத்தத்தில், கொலஸ்ட்ரால் வளர்சிதைமாற்றம், இரத்தக் குழாய் செயல்பாடு, குடல் புற்றுநோய் அபாயக் குறைப்பு ஆகியவற்றுடன் தொடர்புடைய மெட்டபோலைட்கள் அதிகரித்தன. ஆட்டிறைச்சியை உண்டவர்களிடம், நரம்பியல் பாதுகாப்பு, இதய நலம், அழற்சி குறைப்பு ஆகியவற்றுடன் தொடர்புடைய மெட்டபோலைட்கள் அதிகரித்தன. அனிதா ஃப்ளெமிங் தலைமையிலான இந்த ஆய்வு, ஜர்னல் ஆஃப் அனிமல் சயின்ஸ் இதழில் 2025-ல் வெளியானது (DOI: 10.1093/jas/skaf254).